Akụkọ ifo dịka mkpanaka e ji akụzi ezigbo omume: mgbakwasị ụkwụ n’akụkọ ifo mbe na ezi na nwa agwọ na nwa awọ

Abstract

Akụkọ ifo jupụtara n’amamihe pụrụ iche nke na-abawanye akọnuche ma bụrụkwa mkpanaka e ji akụzi eziomume n’ụwa.Ọ bara uru, ọkachasi n'ụlọakwụkwọ ntakara na prima makana ụmụaka na-esite na ya amụta ọtụtụ ihe nke ga-enyere ha aka ịkpa agwa ziri ezi. Ma taa,a na-eleghara ya anya,ọ bụ ya kpalitere nchọcha a. Ebumnuche nchọcha a bụ ịchọpụta ka akụkọ ifo ndị a họpụtara siri bụrụ mkpanaka e ji akụzi eziomume n’ụwa taa. Ndị nchọcha gbasoro usoro nchọcha kenkọwa wee mee nchọcha a.Ihe e ji mee nchọcha a bụ akụkọ ifo abụọ. Akụkọ ifo mbe na ezi na nwa agwọ na nwa awọ. N’akụkọ ifo mbe na ezi a chọpụtara, ajọ omume ịgbaziri ego ma jụ ịkwụghachi ya jupụtara n’ụwa taa. N’akụkọ ifo nwa agwọ na nwa awọ a chọpụtara na ụwa a dịbu mma na mbido mana ọ bụ ụmụ ụwa jiri obi ọjọọ were mebie ya. N’ikpeazụ, nwanchọcha tụnyere alo ka e lebaa anya n’ọmụmụ akụkọ ifo Igbo n’ihi na ọtụtụ ihe mmụta na ezi ndụmọdụ nke na-arụtụgasị aka n’ihe na-eme n’ụwa taa jupụtara na ya..